Səlivə kəndində əhali ilə səyyar qəbul və görüş

Rayon İcra hakimiyyətinin başçısı Qəzənfər Ağayevin əhali ilə ənənəvi olaraq keçirdiyi səyyar qəbul və görüşün növbəti ünvanı Şuvi kənd inzibati ərazi dairəsi üzrə nümayəndəliyinin Səlivə kəndi olmuşdur.

Tədbirdə rayonun inzibati orqanlarının, idarə və müəssisələrin rəhbərləri iştirak etmişlər.

İcra başçısı iştirakçıları salamlayaraq, bildirmişdir ki, nümayəndəliyin Şuvi, Siyatük, Deqədi, Sərək kəndlərində vaxaşırı keçirilən görüşlərimiz müəyyən problemlərin həlli ilə yadda qaldığından səmərəli olmuşdur. Bu gün sizinlə yaşadığınız Səlivə kəndində görüşmək qərarına gəlmişik. Məqsədimiz problemlərlə yerində tanış olub, həllinə birgə nail olmaqdır.

Ən əvvəl sizi və bizi narahat edən vacib məsələ olan kəndə təbii qaz xəttinin çəkilişi ilə əlaqədar bildirirəm ki, bu barədə aidiyyəti üzrə müraciət olunmuşdur. İlin axırına, uzağı gələn ilə bu məsələ tamamilə həllini tapacaqdır. Qalan məsələlər barədə təkliflərinizi verə bilərsiniz.

Kənd sakinləri İlham Məmmədov, Abidin Rüstəmov, İbrahim Qasımov, Ağaşirin Ağayev və başqaları çıxış edərək Respublikada və rayonumuzda görülən geniş quruculuq abadlıq işlərinə görə, həmçinin, əhalinin sosial rifahının yaxşılaşdırılması istiqamətində həyata keçirdiyi çoxsaylı tədbirlərə görə Azərbaycan Respublikasının Prezidenti möhtərəm cənab İlham Əliyevə razılıqlarını bildirmiş, hədsiz minnətdarlıq ifadə etmişlər. Əhali ilə müntəzəm görüşlər keçirdiyinə, qaldırılan problemlərin həllinə həssaslıqla yanaşdığına görə icra başçısına təşəkkürlərini bildirmişlər.

Sakinlər görülən işlərlə yanaşı Deqədi-Səlivə-Şuvi avtomobil yolunun salınması, Səlivə kəndində elektrik xətt təsərrüfatının yenilənməsi, əlavə elektrik transfosmatorunun qoyulması, kənddə istifadə olunmayan torpaq sahəsinin sakinlərə futbol meydançası kimi verilməsi, “Astaraçay  bağları” MMC-nin ərazisindən keçən elektrik xəttinin yerinin dəyişdirilməsinə köməklik göstərilməsi və s. barədə təkliflər vermişlər.

İcra hakimiyyətinin başçısı Qəzənfər Ağayev vətəndaşlar tərəfindən verilən təkliflərə münasibət bildirmiş, həlli barədə aidiyyəti üzrə tapşırıqlar vermişdir.

Sakinlərin elektrik xətt təsərrüfatının yenilənməsi təklifi ilə əlaqədar bildirirəm ki, elektrik xətləri təqribən 60 il bundan əvvəl çəkildiyindən köhnəlmiş, həm istismar müddəti bitmişdir. Həm də təsərrüfatların sayı xeyli artdığından hazırkı transformatorlar tələb olunan enerjini əhaliyə verə bilmir. Amma müntəzəm olaraq cari təmir işləri aparılır ki, əhali fasiləsiz elektrik enerjisi ilə təmin olunsun. Yaxın gələcəkdə bütün rayonumuzda olduğu kimi burada da  elektrik xətt təsərrüfatı tamamilə yenilənəcəkdir.  Bununla əlaqədar müəyyən ərazilərdə artıq işə başlanmışdır. 

Deqədi su anbarının tikintisi ilə bağlı aidiyyəti üzrə müraciət olunmuş, əlavə olaraq Pensər kəndində də su anbarının tikintisi nəzərdə tutulmuşdur. Gələckdə bu işlərin də həllini tapacağı şübhəsizdir.  

Bütün həyata keçirilən mühüm layihələr, görülən işlər ölkəmizin ildən-ilə artan iqtisadi gücünün hesabınadır. Siz də qeyd etdiniz ki, Respublikamız və rayonumuz son illər misli görünməmiş dərəcədə inkişaf etmişdir. Ölkəmizdə davamlı xarakter alan bu inkişaf ulu öndər Heydər Əliyevin siyasətini uğurla davam etdirən möhtərəm Prezidentimiz İlham Əliyevin müdrik rəhbərliyi ilə həyata keçirilir. İcra olunan bütün sosial layihələr vətəndaşların rifah halının yaxşılaşmasına xidmət edir.

Astara rayonunda abadlıq və quruculuq işləri durmadan davam etdirilir. Son aylar cənab Prezidentin rayonumuzla bağlı imzaladığı Sərəncamların sakinlərimiz tərəfindən sevinc və minnətdarlıqla qarşılanması əbəs deyil. Bunların hamısı – Pensərçayda sahilbərkitmə işlərinin aparılması, Doli, Diqo, Şekəşan kəndlərinə elektrik xətlərinin çəkilməsi, evləri qəzalı vəziyyətdə olan vətəndaşlar üçün 36 mənzilli yaşayış binasının inşası olduqca vacib əhəmiyyətli məsələlərdir.

Göstərilən bu diqqət və qayğıya görə bütün astaralılar adından möhtərəm cənab Prezidentə minnətdarlığımızı bildiririk.

İcra başçısı cənab Prezident İlham Əliyev tərəfindən əhalinin sosial rifahının yaxşılaşdırılması ilə bağlı imzaladığı sərəncamlardan da bəhs etmişdir. Minimum əmək haqları, dövlət müəssisələri və özəl sektorda çalışan müxtəlif peşə sahiblərinin əmək haqlarının əhəmiyyətli dərəcədə artırılması misli görünməmiş humanist qərardır.   Azərbaycanımızın bu günü dünənindən güclü olduğu kimi, inamla deyə bilərik ki, sabahı da bu günündən daha güclü olacaqdır.

Üzərimizə düşən əsas vəzifə isə ölkə rəhbəri ətrafında sıx birləşərək ölkəmizdə bərqərar olan əmin-amanlığı, sabitliyi qorumaq, bu günkü inkişafa töhfəmizi verməkdən ibarətdir.