Astarada yeni məktəb binalarının açılışı olmuşdur
Rayonun Qapıçıməhəllə kənd ümumi orta, Lomin və Düriyyə kənd ibtidai məktəblər üçün inşa edilən yeni məktəb binalarının açılışı ilə uzun illər yeni məktəbin arzusunda olan kənd sakinləri nəhayət ki, bu sevinci yaşamışlar. Bu kəndlərdə keçirilən səyyar qəbul və görüşlərdə sakinlər məktəb binasının tikintisinə ehtiyac olması barədə təkliflərini və arzularını icra başçısına çatdırmış, rayon rəhbərliyinin təşəbbüsü və yaxından köməkliyi ilə bu il Qapıçıməhəllə kəndində 96, Lomin və Düriyyə kəndlərində 56 şagird yerlik modul tipli yeni məktəb binaları tikilib istifadəyə verilmişdir.
Qapıçıməhəllə kənd ümumi orta məktəb binasının açılışında rayon icra hakimiyyətinin başçısı Qəzənfər Ağayev çıxış edərək sakinləri bu əlamətdar gün münasibəti ilə təbrik etmişdir. Bildirmişdir ki, böyük inkişaf yolunda olan müstəqil dövlətimizdə bütün sahələrə olduğu kimi təhsilə də xüsusi diqqət yetirilir. Təhsil müəssisələrinin maddi-texniki bazasının möhkəmləndirilməsi və təhsilin keyfiyyətinin yaxşılaşdırılması mühüm məsələ kimi həmişə dövlətin diqqət mərkəzindədir. Son illər Astara rayonunda qırxdan çox yeni məktəb binası tikilmiş və əsaslı təmir olunmuşdur. Elə bu nümayəndəliyin ərazisində Suparibağ, Rüdəkınar kəndlərində tikilən məktəblərdən sonra artıq üçüncü məktəb istifadəyə verilir. Bu tədris ilində rayonda beşinci yeni məktəbdir ki, istifadəyə verilir. Gələn ay Burzubənd kənd tam orta məktəbi üçün inşa edilən 360 şagird yerlik məktəb binası da müəllim və şagird kollektivinin istifadəsinə veriləcəkdir. Bütün bunlar rayonda təhsilin keyfiyyətinin artırılması üçün əlverişli zəmin yaradır.
Müstəqil dövlətimizdə məktəb tikintisi ilə yanaşı həyata keçirilən digər genişmiqyaslı tikinti-quruculuq, yeni infrastruktur layihələrin sürətlə davam etdirilməsi ulu öndər Heydər Əliyevin ideyalarını uğurla davam etdirən ölkə Prezidenti möhtərəm cənab İlham Əliyevin müdrik siyasətinin parlaq sübutudur. Tam əminliklə deyirəm ki, bu cür sosial layihələr bundan sonra da davam edəcəkdir. Rayonumuzda bir dənə də olsun köhnə məktəb binası qalmayacaq.
Yeni məktəblərin istifadəyə verilməsi tədbirlərində çıxış edən valideyn, müəllim və şagirdlər də son illər rayonda aparılan geniş abadlıq və quruculuq, təhsilin maddi-texniki bazasının möhkəmləndirilməsi sahəsində görülən genişmiqyaslı işlərə görə ölkə başçısı möhtərəm cənab İlham Əliyevə dərin təşəkkür və minnətdarlıqlarını bildirmişlər.
İcra başçısı Qapıçıməhəllə kənd ümumi orta məktəbin yeni binasının açılışını bildirən rəmzi lenti kəsmiş, sinif otaqlarına baxmış, tədrisin vəziyyəti ilə maraqlanmışdır.
Sonra İcra başçısına 18 dekabr 2019-cu il tarixdə Bakı şəhərində Azərbaycan Britaniya Kollecinin təşkil etdiyi STEAM üzrə 5-ci sərgidə “Voltran” robototexnika üzrə yay məktəbinin iştirakçısı olan rayonumuzun məktəbliləri Elnur Məmmədov və Salih Atakişizadənin qızıl, Sadiq Məmmədov və Saleh Məmmədovun isə gümüş medal qazandıqları, sertifikat və qiymətli hədiyyələrlə mükafatlandırıldıqları barədə məlumat verilmişdir. Qeyd edilmişdir ki, Elnur Məmmədov "Panqolin" robotu ideyasına görə "ideya çempionu" adına layiq görülmüşdür.
İcra başçısı qaliblərin əl işləri ilə tanış olmuş, layihədə ən yüksək mükafata layiq gəldiklərinə görə onları təbrik etmiş, uğurlarının davamlı olmasını arzulamış, xatirə şəkli çəkmişdir.
