Dəstor kəndində səyyar qəbul və görüş

Rayon icra hakimiyyətinin başçısı Qəzənfər Ağayev növbəti səyyar qəbulu ucqar dağ kəndlərindən olan Asxanakəran kənd inzibati ərazi dairəsi üzrə nümayəndəliyinin Dəstor kəndində keçirtmişdir.  

İcra başçısı bildirmişdir ki, rayonun ayrı-ayrı yaşayış məntəqələrində əhali ilə mütəmadi olaraq görüşürük. Çalışırıq görüşlərimiz bütün yaşayış kəndlərini əhatə etsin. Burada Asxanakəran, Motalayataq kimi iri yaşayış məntəqələri ilə yanaşı, Əzərü, Anbuba, Şıxımpeştə, Bəlbay kəndlərində görüşlərimiz olmuşdur. Bu gün də bu gözəl Dəstor kəndində səyyar qəbul keçirmək qərarıyla gəlmişik.  Rayon mərkəzindən xeyli uzaqda yerləşən mürəkkəb relyefə malik bu dağ kəndlərinin problemləri ilə həmişə maraqlanaraq həllinə köməkliklər göstəririk. Son illər Asxnakəran nümayəndəliyi də daxil olmaqla dağ kəndlərində xeyli iş görülmüşdür. Asfalt yollar çəkilmiş, məktəb binaları tikilmiş, körpü salınmış, əvvəllər Lerik rayonu ərazisindən çəkilən yüksək gərginlikli elektrik xətti Siyaku kəndi ərazisindən çəkilən yeni elektrik xətti ilə əvəzlənmişdir. Hazırda internet şəbəkəsinin çəkilişinə başlanılmışdır.

Bütün bu problemlər möhtərəm Prezidentimiz sayəsində həllini tapmışdır.  Cənab Prezident İlham Əliyevin düşünülmüş, uğurlu siyasəti nəticəsində ölkəmiz beynəlxalq aləmdə sabit siyasətli, demokratik cəmiyyətin formalaşdığı sülhsevər və qalib dövlət kimi tanınır. Müzəffər Ordumuzun Vətən müharibəsində və sonradan keçirilən antiterror tədbirlərində erməni terrorçularını qısa müddətdə məhv etməsi ilə Azərbaycanımızın suverenliyi tam şəkildə bərpa olundu.  Torpaqlarımızda yuva salmış separatizmin kökü birdəfəlik kəsildi. Zaman-zaman verdiyimiz şəhidlərin qisası düşməndən döyüş meydanında alındı. Bu tarixi ədalətin bərpasıdır. Dünyada qalib xalq, qalib dövlət kimi tanınan Azərbaycan sübut etdi ki, bir qarış torpağını belə kimsəyə verməyəcək. Bu kənddən də torpaqlarımızın azadlığı uğrunda könüllü döyüşən igid oğullarımız az olmamışdır. Allahdan şəhidlərimizə rəhmət, qazilərimizə və  qəhrəman hərbçilərimizə can sağlığı arzulayıram.

Azərbaycanın şanlı Bayrağının əzəmətlə dalğalandığı həmin torpaqlarda hazırda sürətli quruculuq bərpa işləri gedir. Amansız düşmənin vəhşicəsinə  taladığı, viran qoyduğu şəhər, qəsəbə və kəndlərimiz tamamilə yenidən qurulur. Bərpa olunan yaşayış məntəqələrimizin məskunlaşdığını gördükcə sevinir, qürurlanırıq.

Bütün bunlarla yanaşı digər regionlarda, o cümlədən, rayonumuzda da mühüm sosial layihələr icra olunur. Cənab Prezident İlham Əliyevin Sərəncamı ilə ayrılan vəsait hesabına 5 kilometrlik Dürriyə-Şümrüd yolunun tikintisi başa çatdırılmış, 26 kilometrlik Çayoba-Astara avtomobil yolunun tikintisi davam edir. Bundan başqa bir neçə avtomobil körpüsü salınmış, Sərək və Şümrüd kənd tam orta məktəbləri üçün yeni binaların tikintisinə başlanmışdır.   

Rayon mərkəzindən xeyli uzaqda, dağlıq ərazidə yerləşən kəndlərdə görülən yüksək səviyyəli abadlıq-quruculuq işlərinin dövlətin öz vətəndaşlarına böyük diqqət və qayğısının təzahürü kimi qiymətləndirən sakinlər ölkə rəhbəri möhtərəm cənab İlham Əliyevə dərin hörmət və ehtiramlarını bildirmişlər. Çıxış edənlər kəndə qaz xəttinin və internet şəbəkəsinin çəkilməsinə, qış tədarükü üçün güzəştli qiymətlə odun yanacağı ilə təmin edilməsinə , kəndə gedən 500 metr avtomobil yolunun təmir edilməsinə, Hamoşam-Şağlazüzə yolayrıcında və Taxtanəkəran-Toradi avtomobil yolunun başlanğıcında tənzimləyici yol nişanlarının qoyulmasına və avtomobil yolunun xətlənməsinə köməklik göstərilməsini xahiş etmişlər.

İcra başçısı müraciətlərin müsbət həlli istiqamətində tədbirlərin görülməsi üçün aidiyyəti üzrə tapşırıqlar vermişdir.